Ытти пайӗсене кунта тупма пулать.
Ҫӗр тӗлӗрет: канать ир умӗн,
Кӑшт анаслас килет тӗнчен;
Ҫӳҫентермест-тӗр сывлӑш хумӗ
Касса халь Атӑл леш енчен.
Кавруҫӑн ыйӑх ҫук. Чечек
Ҫӗр каҫиччен те куҫ хупман:
Пуҫра пин шухӑш — чун кӳтет.
Мӗн чухлӗ ҫӗр каҫа утман
Вӗсем вӑрман тӳр ҫулӗ тӑрӑх,
Мӗн-мӗн илтмерӗ-ши ката?..
Ыр туйӑм юратушӑн — вӑрӑ:
Вӑрлать илемлӗ вӑхӑта.
Чӑнах та вӑхӑчӗ кӗске,
Кӑвакарма пуҫлать кӗҫ шуҫӑм.
Вара тулать кар янкӑр уҫӑм
Шупка-шупка сенкер тӗспе.
Анчах та Чечекпе Кавруҫшӑн
Ҫитес ир савӑнӑҫлӑ мар.
Вӑл пулӗ икӗ ҫамрӑк пуҫшӑн
Вутран юлайнӑ шел кӑвар:
Пӗр саманта анчах телей
Хӳреллӗ ҫӑлтӑр пек ҫӳрерӗ,
Хӑна пулма та ӗлкӗрмерӗ,
Иртсе лармарӗ тӗпеле.
«Чечекӗм, эс хӑвах куратӑн:
Хура кунсем, ак, сан умра.
Пӗлетӗп: эс пуҫна хуратӑн
Пӗрле пулмашкӑн, ман ҫумра,
Мӗн чухлӗ савӑнӑҫ паратӑн —
Эс манӑн пурнӑҫ, ман талант.
Манпа пӗрле пӗрмай утатӑн,
Ҫапах, пӗлетӗп, улталан
Хӑвна ху ҫутӑ кун кӗтсе.
Пӗлетӗп: ӗмӗтӳ сан хӑвӑн,
Анчах, хӑратӑп эп, мӗн тӑвӑн,
Илемлӗ шанчӑку пӗтсен?
Чӗкеҫӗм, кай, пытан: ыйтатӑп,
Ҫухал кунтан эс хӑвӑртрах».
«Ҫук, ҫук, Кавруҫ, санпа юлатӑп,
Тен, усӑ парӑп вӑхӑтра».
«Чечекӗм, халь кайма хушатӑп
Эп ушкӑн пуҫӗ ячӗпе.
Ах, кӑмӑл хуҫӑлчӗ-ҫке шатӑрт
Ӑшра тем ларчӗ лӗкӗ пек».
«Кавруҫ, хӗрхен...»
«Ан хирӗҫ, тусӑм,
Мана пит йывӑр, ху пӗлен.
Шӑпа — вал йӗкӗлти. Ан усӑн,
Ун умӗнче ан упален.
Ман арам, сывӑ пул, ан улшӑн,
Кашни кун пултӑр сан шутра.
Чечекӗм, эс килес кун-ҫулшӑн
Ман йӑх тымаррине упра».
Ылханлӑ, вилӗмлӗ сехет
Ҫак вӑхӑтра персе те ҫитрӗ,
Ыр кунсене ӗмӗрлӗхе
Хура пӗркенчӗкпе вӑл витрӗ.
Ытла та йывӑр уйрӑлма,
Пӗччен юлни чуна касать-мӗн...
Пӳрни, пӳрни! Ӑҫта ӑсатмӗ,
Ӑҫта килет пуса хума?
Тӑхта, — те ҫывӑрса тӑранчӗ? —
Таҫта, ав, авӑтать автан...
Кавруҫӑн ушкӑнӗ вӑранчӗ
Шуралнӑ шуҫӑмран малтан.
Канаш тытаҫҫӗ шӑппӑн-шӑппӑн —
Пӗр сӑмахне ан илттӗр ҫил.
Эс пӗлӗт, кур, ан тӑр-ха лӑпкӑ,
Ҫак вӑхӑта эс ту пехил.
Чӑваш ҫынни халь ҫӗн тӗнчешӗн
Пит пысӑк йывӑрлӑх илет.
Тавра, ан пул эс мӗшӗл-мӗшӗл —
Хӑрушӑ вӑхӑт халь килет.
Статья каҫми :: Пичет версиӗ 
+2.3 °C